香港回歸十二年，人心一直未真正回歸。不過，由政府委任嘅法定機構，成員愈嚟愈「紅」，就係不爭事實。博彩及獎券事務委員會轉莊，政府一口氣委任九名新面孔，今日生效，為期兩年，成員一半有親中色彩，其中全國政協委員容永祺，仲取代鄭慕智做主席。
政府尋日委任博彩及獎券事務委員會成員，前全國人大常委曾憲梓兒子曾智雄同林黃碧霞獲再度委任，新面孔有九個，其中余鵬春係裕華國貨董事副總經理、葉振都係香港青年聯會常務副主席、招祥麒係培僑中學校長、灣仔區議員邱浩波早前發起「漣漪」行動，被視為幫疑似特首候選人梁振英造勢築台，而廖湯慧靄就係婦協副主席，個個都同香港嘅親中人士關係密切。
新任主席容永祺近年彈出，本身係香港專業及資深行政人員協會會長嘅佢，去年初當上全國政協委員，身影開始活躍於親中酒會；今次獲委任做博彩及獎券事務委員會主席，相信同呢個背景不無關係。