本文重點
去年十月中信泰富炒燶外匯，董事總經理范鴻齡今年四月請辭，連「公職王」稱號都自動搣甩埋，辭晒所有重要公職，真正無職一身輕，從此亦絕迹政經界各大小場合。卓妮尋日喺中環威靈頓街巧遇范鴻齡，不見一段時間，呢位「政壇梁家輝」精神奕奕風采依然，個「蛋撻頭」依然風吹不倒。范鴻齡話辭咗職後一樣咁忙，忙於還人情債，要四圍飛去外國探朋友。
中信泰富未出事前，范鴻齡喺政商界前途康莊，仲一度傳佢有力角逐二○一二年特首添。卓妮尋日問范鴻齡幾時重出江湖？佢話，呢樣嘢唔講嘞，還晒啲債先啦！不過唔係中信泰富炒燶外匯要佢填氹，而係佢以前應承落好多朋友見面敍舊，依家唔使返工，係時候還清呢堆人情債嘞。
買實力股唔驚坐艇
中信泰富喺股海重創，最近恒生指數重上二萬點，返番金融海嘯前水位，范鴻齡唔肯講政治生涯，卓妮於是叫佢講吓個市。行內人即係行內人，范鴻齡分析頭頭是道，話睇番港交所嘅數據，就知道香港一直都係資金市，多熱錢流入，易升易跌，依家股市回穩，大家小注怡情無所謂，但切記小心駛得萬年船！佢又話，自己都有投資，不過以實力股為主，咁就暫時坐艇都唔驚啦。