劉麥懿明老公係搞手

十年前，動漫節嘅前身漫畫節第一次同書展分家，當時仲做緊民政事務總署署長嘅媽打應邀做主禮嘉賓。十年轉眼過去，已經離開官場嘅媽打尋日依然現身動漫節，何解？原來有份籌辦動漫節嘅凌速博覽有限公司主席劉偉傑搵佢嚟。劉偉傑係何許人？媽打八畀卓妮聽，話劉偉傑嘅太太正係稅局局長劉麥懿明，以媽打同劉太嘅交情，媽打梗係無托手㬹啦，一於畀面出席！

劉偉傑相當低調，攝影師舉機同佢影番張相，佢都怕怕醜醜避鏡頭。唔講唔知，過去一共十一屆嘅動漫節，都係由凌速博覽做籌辦單位。記得劉太以前講過老公係生意人，睇嚟生意都做得唔錯噃。

尋日陪住媽打現身嘅，仲有佢契女、八仙嶺山火生還者蘇婉珊。蘇婉珊已經大學畢業，暑假做緊媽打助理，幫手搞籌款；媽打笑笑口話，呢啲都算係標尾會咯。卓妮就覺得，好人做好事，始終都會有回報嘅！

久未露面嘅發叔黃宏發，都不下一次做動漫節開幕嘉賓啦。發叔話細個都有睇連環圖，好似《七俠五義》嗰種，不過依家好少睇；梗係喇，發叔正埋首將唐詩三百首由中文譯成英文嘛！

卓妮