嗱，位於沙田上禾輋村、有成七十年歷史嘅本港著名觀光點龍華酒店就係寶啦，穿過百幾米嘅石級通道，大紅燈籠、孔雀籠、粵語長片一樣嘅園林景致，簡直好似走入咗條時光隧道咁，返番去幾十年前嘅舊香港，有邊個夠膽話龍華酒店唔係沙田最著名嘅地標之一？

不過，大家要發思古之幽情，唔該趁早好去嘞，因為呢間咁有特色嘅食肆，隨時會關門大吉都未定㗎。唔係啩？一笪咁有集體回憶嘅地方，因乜事會突然變成香港人嘅永遠回憶呢？

仲使講，之唔係多得呢個政府囉，班高官開口埋口話香港係旅遊之都，但一直冇乜點宣傳推廣過龍華酒店，好彩「龍華」仍然有個朵，每個星期吸引到近兩萬遊客觀光，幫手撐住旅遊業呢條經濟支柱！

問題係政府唔識貨就算嘞，仲要諸多刁難。據東主講，地政總署原批出一幅土地予「龍華」代客泊車，但土地面積只係泊得一架車咁大把，唔通叫人踩單車去咩？之後當局又搞新花樣，要求「龍華」喺嗰度整個泊車亭，結果泊車亭建成後，幅地一架車都唔泊得。查實「龍華」以往一直用荒地當臨時停車場，但多次向政府磋商租用，當局以「土地另有用途」為由拒絕出租。

到底「土地另有用途」係用嚟做乜呢？原來地政總署留番畀運輸署整六個咪錶位，用嚟與民爭利！咁都未夠絕，運輸署仲要喺泊車亭兩旁馬路畫雙黃線，遊客車唔到門口，又點可以代客泊車？分明就係想逼死「龍華」！

仲有呀，通往「龍華」嘅行人天橋既冇蓋又冇照明，連最基本嘅安全都成問題，東主蝕底啲願意承擔部分費用，但政府部門之間又係將個波推嚟推去，最後運輸署竟然以「使用人口不足」否決工程，真係離晒大譜！

一個地政總署、一個運輸署都未夠煩，當局慌「龍華」唔死咁，又搵多個環保署出手。「龍華」明明按當局要求，使咗二百萬元安裝處理污水系統，但官員每次收集污水樣本時，都將村民嘅污水同「龍華」經過處理嘅污水混埋一起，東主同環保署解釋到口水乾晒都冇用，次次都話唔合格。

東主話曾經有發展商以高價收購「龍華」，但佢為咗要保存呢個香港人嘅集體回憶，點都唔肯賣。不過依家政府部門咁搞佢，做到意興闌珊兼谷住成肚氣，不排除索性執咗佢，咁就唔使傷腦筋啦！

唉，提起香港嘅文物保育，功夫茶就把幾火。政府劑劑都係後知後覺，港島半山大宅景賢里被人拆到甩皮甩骨，當局先至識得急急腳列為暫定古蹟；一代國際巨星李小龍嘅故居，唔係業主出錢出地支持，邊度有得剩呀？

你話政府無錢咩？又唔係喎，億億聲將啲錢掟落去畀迪士尼樂園填氹又唔見肉痛，你話奇唔奇吖？成班官都係唔識寶，你問佢沉香係乜，十個有九個會答係「爛柴」。

唔該班高官唔好再添煩添亂當幫忙啦，香港景點已經買少見少，雍雅山房冇咗，荔園又冇埋，以後啲小朋友可能會當大商場係古蹟呀！