恒生銀行「一姐」梁高美懿上場後為咗加強同員工溝通，喺公司內聯網整咗個CEO Blog，大爆自己嘅私生活同個人感受，早前佢就出賣咗自己細個同做女嗰時嘅靚相，今次就講到自己嘅豐富外遊經歷，其中兩張相隔超過十年嘅旅遊照片，相中人幾乎完全冇老過，顯示梁太除咗識得做銀行之外，養顏護膚亦有一手。
梁太喺網誌中透露，自己讀初中時就第一次跟屋企人去台灣旅行，自己婚後亦經常舉家外遊，幾乎全世界都畀佢去勻。當中印象最深嘅係九十年代初第一次坐郵輪歐遊，去咗荷蘭、德國、英國、法國同意大利五個旅遊勝地；新西蘭、瑞士、加拿大同內地佢都好鍾意去；不過講到最喜愛嘅，始終係佢喺當地打過工，以及陪同囡囡一齊成長嘅澳洲。
梁太認為旅遊係一個好好嘅減壓方法，每次玩完返嚟都會充滿活力，今年四月佢由滙豐調職恒生前，就特意同家人重遊澳洲，為新工作充電。雖然佢返份新工都唔夠三個月，但已經期待緊下次外遊機會，認真識歎。