商務及經濟發展局最近推出咗一條同電台發牌有關嘅《二○○九電訊（修訂）條例草案》，內容其實無乜特別，只係將行之已久嘅行政指引，白紙黑字寫落條法例度，好等大家都知道原來係有一個公開發牌準則，點知議員呢輪就好鍾意講程序，有議員尋日大鑼大鼓開咗個記者招待會，話不滿政府靜悄悄咁推出條草案，仲聲言要去信內務委員會跟進添。
議員話政府出呢條草案前，無先去立法會資訊科技及廣播事務委員會過冷河，連委員會副主席都被蒙在鼓裏，然後鬧條草案唔止無諮詢過立法會，連市民都無諮詢，究竟係咪又一次黑箱作業呢？
商務及經濟發展局亦急急發聲明，強調草案今次加入嘅準則全部都唔係全新條文，只係引用現行嘅行政指引，又話相信畀議員喺草案委員會討論係最直接嘅方法，期望討論喺暑假後展開，有需要的話，政府好樂意依家就向議員講解草案喎。
查實市民對呢啲咁嘅爭拗，不僅完全無興趣，而且已感到相當厭煩，只係想議員同政府官員做啲實事，唔好再尸位素餐。