高官們近日爭住放暑假，財經事務及庫務局副局長梁鳳儀（Julia）下個月底都會歐遊去也，地點係英國，皆因佢要盡母親責任，陪小朋友去英國開學。不過據聞為咗協調雷曼迷債回購方案，Julia一度許下傾唔掂，就唔放假嘅諾言，猶幸天公作美，隨着回購方案上周出爐，Julia終於可以鬆一口氣了。
雷曼迷債回購方案的談判相當迂迴，Julia身為財金高官，連月來周旋於證監及銀行之間斡旋。為應付呢場拉鋸戰，聽聞Julia曾一度許諾，聲言傾唔掂數就連假都唔放，佢咁講唔知係想激勵吓佢自己定係想畀啲壓力下屬，等大家快手快腳喺暑假前搞掂回購方案。
Julia雖然如願搞掂雷曼回購方案呢個燙手山芋，不過金融海嘯第二波唔知幾時又殺到，睇怕一眾財金高官都係唔好開心得太早，否則金融巨浪突襲，只會措手不及！