本文重點
海洋公園門券大幅加價兩成，向小市民開刀，等於自毀過去多年建立嘅親切形象，甚至粉碎窮家小孩每年去一次海洋公園嘅美夢。以前經常帶兒子到海洋公園遊玩嘅協成行集團副董事總經理方文雄話，從營商角度來說，加價可以接受，但加幅太大會令基層市民負擔唔起，他於是想出一條好橋送畀海洋公園。
每周每月搞特惠日
卓妮日前遇到方文雄到鏞記酒家食晏，講起海洋公園堅持大幅加價，他就建議海洋公園可以搵慈善團體贊助經費，每星期或每月設立一日「特惠日」，讓低收入人士購買廉價門券入場，而其他日子就照常加價，相信會係一個雙贏方案。雖然海洋公園董事局將考慮押後加價，但押後不代表唔加，或者可以考慮吓方文雄嘅建議。
方文雄又話囝囝已經大個仔了，所以近年已好少去海洋公園，反而鍾意同囝囝們去行山，等佢哋唔好成日掛住上網同打遊戲機喎。他依家每逢星期六早上都會同囝囝們到山頂徑、寶雲道及大潭道一帶行山，佢話行山有好多好處，一來唔使錢，二來空氣清新令身體健康，而且一邊行山，一邊可以同兩個仔溝通多啲，增進感情，真係一舉幾得。
卓妮