觀塘游泳池有逾三十年歷史，今年年底將展開重建工程，聲稱將打造成東九龍區最具規模的室內游泳池，惟現有嬉水池與跳水池將不獲保留。泳客許先生坦言對重建計劃大表不滿，「我朝朝帶個仔去跳水，唔通以後要轉幾程車去將軍澳同紅磡先玩得？」

有逾三十年歷史的觀塘游泳池重建後，跳水池將從此消失。

中國跳水隊去年訪港期間曾掀起跳水熱潮。

資源分配不均

對於跳水池買少見少，跳水教練黃國基直斥康文署資源分配不均，「全港得嗰十幾個跳水池，有啲唔符合安全標準、有啲又話冇保養成日唔開放，我哋租嚟租去都係得嗰五、六個，將來可能連租都冇得租！」

港九拯溺員工會發言人郭紹傑透露，自從○四年起康文署削減三成，每個泳池只得三人當值，與國際標準四至六人有距離。「依家每個池只係得番minimum（最少）嘅人手，萬一有一個返唔到工，就要暫停設施，跳水池、滑水梯一定係首選！」

郭指部門早有不成文規定，容許在人手不足的情況下關閉部分設施，當中以跳水池的影響最大。

康文署發言人表示，受面積所限，加上跳水池使用率偏低，經諮詢觀塘區議會及相關委員會後，決定重建後的觀塘游泳池將不設跳水設施。市民日後可前往分別位於將軍澳、大環山、九龍公園或深水埗等游泳池使用跳水設施。發言人又稱，跳水池除遇惡劣天氣或維修等特別情況外，開放時間一般會跟泳館開放時間看齊。

石先生：「以前都有帶小朋友去跳水池玩，但依家就成日無端端封池，又唔係冇救生員，唔明點解要封！」

陳先生：「有跳水池巿民就可以練跳水，既然有就唔應該封，更唔應該拆！」

藉口使用率低

不過，觀塘區區議員林家強認為康文署解釋並不合理，「嗰陣時康文署成日話面積唔夠，我哋理解係要取捨，但係話使用率低就絕對唔係一個成立嘅理由。」林指一直有聲音要求康文署考慮在區內另覓地方重建跳水池，促康文署能順應民情。

全港現時共有十七個公眾泳池設有跳水設施，但部分已停止使用，其中摩士公園游泳池的跳水池便因不符現有安全標準，○七年四月起已停止開放，而沙田賽馬會游泳池亦曾被發現圍上封條；城門谷游泳池設跳台，但因跳台設於大池內，凡使用者需連同整個室內主池租用。

■記者 柯翠菡