搭巴士點解要自備救生錘嘅呢？先睇睇四川，成都前排發生一宗火燒巴士慘劇，由於車上竟然冇救生錘，超過一百名乘客逃生無門，部分活活燒成焦炭。結果，二十七死，七十二傷，十分恐怖。

慘劇揭發一個可能係中國獨有嘅怪現象，原來內地同胞好百厭，非常鍾意偷走巴士嘅救生錘。巴士公司本來係冇咗一個錘，添置一個錘，可惜失竊率實在太高，煩不勝煩之下巴士公司索性求求其其算鬼數，巴士就變咗無錘可救生嘞。

有見及此，醒目嘅內地同胞靈機一觸，瘋狂搶購救生錘，自用又得，送禮亦得，銷量飆升三十倍。正所謂，一錘傍身，世界通行，遇難扑一扑，來回地獄又折返人間。

大家可能會話，喂，咪住先，內地同胞就話百厭到極啫，香港同胞唔會偷巴士嘅救生錘咁冇公德心啩？大家有所不知嘞，香港同胞的確好有公德心，救生錘係唔會偷嘅，問題係，想偷都冇得偷，因為香港嘅巴士原來大部分係冇救生錘㗎！

好似九巴，三千九百部巴士之中，多達一千七百部係冇救生錘嘅。至於新巴以及城巴，更加得人驚，估計超過九成巴士不設救生錘。所以你話嘞，搭巴士係咪要自備救生錘吖？

如果你以為香港嘅巴士係絕對防火嘅金剛不壞之身，因此冇必要配備救生錘，咁你就大錯特錯嘞。首先，香港每年發生幾十宗巴士冒煙甚至着火嘅事故，有時仲會出現幾分鐘之內燒通頂嘅恐怖情況。其次，運輸署唔知係懶定係蠢，居然一直冇嚴格規定巴士車廂要採用防火物料。於是乎，巴士公司為求減輕車身重量，竟然以易燃嘅玻璃纖維取代鋼鐵製造外殼。

簡單咁講，巴士其實係好惹火嘅，外殼又易燃，座椅又易燃，一個唔覺意就會淪為流動火葬場。所以大家千祈唔好以為成都燒巴士慘劇唔會喺香港發生，加上巴士大部分係密封嘅，搵條逃生出路都幾難。

因乜解究運輸署唔去要求巴士公司改善防火物料呢？點解又唔強制安裝救生設備呢？

功夫茶思疑係懶多過蠢，你知啦，要求呢樣強制嗰樣需要修改法例吖嘛，牽涉好多工夫㗎，又要研究，又要開會，尤其麻煩嘅係要掟上立法會交由議員拍板通過，期間少不免受到炒蝦拆蟹嘅待遇。香港官僚精甩辮，當然唔會咁傻仔自動送上門捱鬧，所以咯喎，話之你無情白事燒鬼死，官老爺返工放工又一Day。

明白未？巴士惹火官不管，搭巴士唔想做燒豬，最穩陣就係自備救生錘嘞！