本年度立法會分別有兩個引用權力及特權法成立嘅專責委員會，一個係調查梁展文離職後工作嘅專責委員會，另一個係雷曼調查小組委員會。由於專責委員會嘅職責係調查真相，追究責任，取證過程中往往涉及唔少機密資料，所以立法會秘書處千叮萬囑攞咗呢啲文件嘅議員要小心保管。
不過，立法會議員長毛梁國雄今個星期一開完梁展文聆訊後，竟然唔見咗擺放聆訊相關文件嘅背囊。立法會規定，若果有人遺失機密文件就要報警，不過長毛只係叫傳媒幫佢留意吓。直至尋日朝早，有電台致電長毛，話幫佢搵到背囊。原來長毛星期一開完會後，上咗電台做節目，之後就將個袋留低咗。長毛解釋：「嗰日攰過頭，根本唔記得喺邊度唔見。」
今次長毛好彩搵得番啲文件，但佢似乎冇從事件中吸取教訓，仲振振有詞話：「佢哋（立法會職員）話機密就機密啦，不過我就認為係官僚嘢。」問佢應否為事件負責同以後點避免同類事情發生時，長毛仲係好不以為然話：「人人都會唔見嘢㗎啦！」唔知喺佢心目中，咩先至係機密文件呢？