前天文台台長林超英（黑英）雖然退咗休，但活躍程度不減在位時，尋日黑英去書展兒童天地講古仔，吸引咗七十幾個家長同小朋友一齊嚟捧場。咁講咩古仔呢？當然係同黑英專長嘅天氣有關啦！尋日黑英講嘅古仔叫《氣候變了怎麼辦? !》，咪以為個題目好悶喎，黑英不時扮吓動物叫，又出題目考吓台上嘅小朋友，答啱問題仲可以收到糖同書添，大家反應不知幾熱烈，聽到班小朋友拍爛手掌。
黑英講完古仔之後就話非常滿意小朋友嘅反應，再加上佢問啲有關溫室氣體、臭氧層等問題，班小朋友個個都識答，覺得好安慰，話依家啲小朋友對氣候變化嘅感覺仲深過班大人喎。不過黑英謙稱對自己嘅表現唔係太滿意嘞，佢話一向希望講古仔嘅時候大家好似聽棟篤笑咁，個個笑到唔停口，但尋日見班家長都無乜點笑，覺得自己講得唔合格喎。
其實黑英對自己要求太高嘞，事關佢一講完古仔，成班小朋友即刻圍住佢又攞簽名又要握手，仲要用「包剪揼」嚟爭剩低嘅古仔書；黑英咁受小朋友歡迎，證明佢講古仔悶極有限喇！