超市格價指數、《選擇》月刊都係消費者委員會嘅產品，屈指一算，原來消委會成立咗三十五年，消委會尋日仲搞咗個研討會，請來七位前主席及現任主席同大家話當年。第二任主席周梁淑怡話印象最深刻係打擊黑店。莎姐話，當年有黑店唔單止呃人，仲會打人，消委會經一番努力後，終於可以將黑店名稱公布，等消費者有所警惕；點知「道高一尺，魔高一丈」，黑店諗到不停改名嚟逃避。莎姐後來做咗旅發局主席，仲係要面對黑店問題，有乜辦法唔深印象。
第五任主席胡紅玉就話幫消委會爭取到買永久會址，係佢任內最大成就之一。阿Ann話未有會址前，兩年就要搬一次辦公室，又要捱貴租，認真唔划算；買咗永久會址後唔使咁頻撲喎。
阿Ann嘅另一得意之作，就係以訴訟基金形式為消費者打官司，令消費者受法律保障。幾位主席話當年輕鬆風趣，台下觀眾笑不停，但前消委會主席、現任財經事務及庫務局局長陳家強嘅出現，就令到大家好掃興。
陳家強貴人事忙，遲咗成粒鐘，一位前主席忍唔住暗寸佢，話自己坐港鐵嚟都係遲到，唔知局長坐咩車嚟。個個前主席分享都唔使點睇稿，惟獨陳家強分享時要照稿讀，悶到有主席即場瞌眼瞓。