老屈議員偷懶

不過，根據我哋明查暗訪，事件真相係鬍鬚曾自己想逃避問責，出陰招阻撓委員會開會，之後仲要老屈班議員偷懶，認真陰濕！

鬍鬚曾以黑箱作業嘅手法，委聘煲呔曾嘅家臣攞命陳接替任總，引起社會嘩然同多名議員不滿，其中白鴿黨嘅何俊仁喺上個星期一就去信財經事務委員會主席陳鑑林，要求佢盡快安排開會公審鬍鬚曾。橄欖亦立即透過立法會秘書處發信畀各名委員，要求佢哋喺嚟緊星期一或之前，回覆同唔同意及幾時有空檔開會。

委員會一共有十九名委員，其中多人的確已經或者即將要離開香港，其中會計界陳茂波跟咗立法會滅貧小組嘅外訪團去咗南韓同台灣；保險界陳健波就去咗武漢睇日食；副主席湯家驊去咗英國出席囝囝嘅畢業禮，八月中先至返香港；金融界李國寶、中總黃宜弘、自由黨方剛同經濟動力梁君彥等，亦因不同理由飛走咗，部分人喺八月立法會正式抖暑前都返唔到嚟。

其實委員會只需要有七名委員出席，就夠法定人數開會；即使扣除不在港嘅議員，都仲有十二名委員喺香港，理應唔難夾時間；細查之下，別有內情。原來鬍鬚曾近日發散人馬，明示或暗示叫班建制派委員唔好支持開會，或者叫佢哋扮忙話自己冇時間開會，等佢可以逃過畀立法會公審嘅命運。到立法會十月復會時，攞命陳已經正式上任，到時社會嘅關注點已經轉咗落攞命陳身上，唔會再對之前嘅委任程序追得咁緊。

本來唔少建制派議員本身一早安排咗暑期活動，唔想為呢單嘢改期開會，好樂意幫鬍鬚曾一把，但部分人就不滿當局同時又向傳媒放風，將開唔成會嘅責任推喺議員身上，令市民以為佢哋真係掛住去玩唔肯開會。究竟鬍鬚曾嘅陰招能否奏效，等多幾日就會揭曉。