尋日喺一個活動上，有唔少城中富商亮相，好似「褲王」楊釗、前全國政協常委張永珍、霍英東家族接班人之一霍震寰，同「小金王」胡經昌等，卓妮問邊個係雷曼苦主，佢哋全部都話投資穩健，無買雷曼。卓妮惟有打電話畀田少，睇吓城中富豪點睇呢個和解方案。

身家數十億元嘅田少話，佢同成班富豪朋友，股市投資總值肯定超過一百萬美元，銀行賠幾多都無佢哋份，不過，佢哋唔介意成為被銀行「歧視」嘅二千分之一，事關佢哋喺股海蝕嘅錢，第日好有機會賺番返嚟，但有啲弱勢社群就未必咁易翻到身，獲得多啲保障係應該嘅。

倡細戶接受方案

田少為雷曼細戶開心之餘，建議大家接受方案，話攞番七成本金，喺樓、股向好時再搏殺，隨時賺番之前蝕咗嗰截，但如果選擇打官司，分分鐘拖得幾年，機會成本好高，又未必爭取到更高賠償額；即係話，無論個算盤點打，都係啲錢喺個袋度最安心。

卓妮