本文重點
行政會議召集人梁振英（CY）講過「Ｎ屆唔選特首」，但最近呢個「Ｎ」字已經變成Nothing，CY頻頻搞「振英飯局」聯繫不同界別人士，尋晚仲帶埋太太和細女去捧泛民陣營嘅公共專業聯盟電影籌款，參選特首之意路人皆見。CY今次去籌款活動除咗同泛民打好關係外，放映嘅《哈利波特——混血王子的背叛》更加係佢一家嘅至愛，可謂一舉兩得！
與袋巾傑同台握手
今次公共專業聯盟主席黎廣德邀請CY做嘉賓，聽聞泛民中人好有意見，仲話拒絕出席避免變相幫CY站台做騷，但最終都有個梁家傑出現，兩個疑似下屆特首候選人同台握手，有啲先禮後兵嘅感覺，期間兩人仲忽然講起湊女經。問CY知唔知有泛民中人對佢不滿？CY就好大體話，大家都係專業人士，雖然服務對象唔同，但有共同目標，最終都係「殊途同歸」。
CY同泛民行得咁密，莫非唔驚建制派起戒心？CY好有信心話「唔會」，因為佢經常出席建制派舉辦嘅活動，話口未完嚟緊有個大型音樂劇籌款，佢已答應咗會出席。講番哈利波特，CY話佢一家五口都係波特迷，一至七集小說都睇過晒，但去戲院睇電影就第一次。問佢最鍾意邊個角色，答案係哈利波特！
卓妮