崔世安喺離島區坊會負責人陪同下，先行去路環市區十月初五馬路天主教堂公園一帶，巡視小巷內嘅士多店及路環碼頭附近嘅海味店，仲幫襯買地道鹹魚，崔世安豎起手指大讚話：「澳門鹹魚好有名，最威水！」咁識硬銷，簡直變身澳門生招牌。

崔世安去到邊買到邊，轉頭走去有氹仔旅遊區食街之稱嘅官也街買手信，猛掃老婆餅、鹹切酥、燕窩撻、葡撻請在場傳媒一飽口福，之後轉去官也街一間豬扒包茶餐廳，門口大排長龍，忍唔住戥老闆高興話：「老闆，生意好好喎！」與市民打成一片。崔世安之後再行去附近嘅北帝廟，聽取坊會負責人介紹旅客遊覽古蹟嘅情況。

崔世安話，兩個離島旅遊區地點夠旺，有得食又有得影相，充滿懷舊風味及自然面貌，係澳門嘅地標同旅遊品牌，日後會活化舊區中嘅古蹟和文化遺產，搞活整個營商環境。佢又拍心口話關注路環和氹仔居民嘅生活環境，會研究改善住屋需求，盡快研究喺離島另覓地點興建新醫院，加緊商討興建第四條連接澳門同離島大橋嘅可行性。