今次建制派武林大會由民建聯主席做召集人，喺上海總會舉行，唔計泛民二十三人，應該有三十六人出席（立法會主席身份敏感，故不在邀請名單之內），但只嚟咗廿五人，自由黨、專業會議、五散人、經濟動力同工聯會都有代表出席。聽詹培忠講，建制派都想好似泛民咁，定期搞飯盒會碰頭，一月一大搞，一周一小搞，上星期係一個開始咁話。不過，民記主席就話，無呢個計劃，又話約建制派同僚食飯，純粹想「休會前聚一聚」，別無其他。不過，我哋聽到就無咁簡單嘞。

眾所周知，新一屆立法會建制派陣營出現一支「親中反曾」小隊，佢哋嘅共通點係對煲呔曾政府時有不滿，怨氣累積，投票立場無路捉，好似成立調查雷曼事件專責委員會一役，已經玩謝政府。據悉，民記今次就係要代人出手，凝聚番呢班建制派生番，尤其要喺年底政改諮詢文件出台之前，箍實呢三十六張票。