本文重點
豬流感肆虐全球，不過細菌嘅殺傷力看似雷聲大雨點小，當初如臨大敵嘅香港人已經將豬流感當成普通流感。立法會議員葉劉淑儀嘅千金葉榮欣雖然喺正好接近病毒源頭嘅美國讀書，但榮欣拍晒心口話唔驚，仲話豬流感「冇乜嘢」。佢自爆灣仔維景酒店被封嗰段時間，美國嗰邊都有報道，佢同朋友喺美國開緊派對，大家一邊食薯片一邊睇電視，當正睇娛樂節目咁喎。
懶理豬流感
上周六，葉太揸旗嘅匯賢智庫舉行籌款晚會，囡囡榮欣專登由美國返港撐場做司儀，一出場即以超短迷你裙示人，又講得一口流利英文，成個鬼妹仔咁款，同嚴肅嘅葉太相映成趣。
卓妮問榮欣美國疫情有否變本加厲？佢輕描淡寫話，美國抗疫工作唔似香港咁緊張，出街冇乜人戴口罩，媽媽九月都會去美國陪佢開學，證明當地疫情只係濕濕碎。葉太都話冇有怕，皆因外國地方大，人煙少，應該冇咁易中招喎。
凡事樂觀當然係好事，之不過香港近日已經出現豬流感嚴重個案，唔少專家都發出警告，預測病毒隨時變種，第二波嘅殺傷力會更強，卓妮奉勸大家都係要安全第一，記得勤洗手！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |