事發地點係孕育本地超過一半雀鳥品種嘅重要濕地塱原，鄰近河上鄉村民好痛心咁發現，大片農地同埋魚塘被建築廢料覆蓋，有成個人咁高，泥頭車出出入入，肆無忌憚傾倒泥頭。農田使用者係八十二歲嘅侯老太，見到耕種半世紀嘅土地滿目瘡痍，傷心到欲哭無淚。村民向政府部門投訴啦，哈，得到嘅回應係你推我讓，警方啦，環保署啦，規劃署啦，地政處啦，統統耍手擰頭話唔關佢哋事。

見到農田變廢墟，侯老太一方面固然傷心到極，另一方面咯喎，佢更加係擔心到死，點解呢？因為特區政府好得意㗎，唔會嚴拿傾倒泥頭嘅大壞蛋，反而會懲罰無辜嘅受害者。侯老太擔心嘅係，規劃署隨時會將佢當做代罪羔羊，向佢提出檢控！

千祈唔好以為侯老太係杞人憂天，更加唔好以為功夫茶聳人聽聞，舊年就發生過一單咁荒謬嘅個案。

去年五月，大埔汀角又係有人喺農田傾倒泥頭，涉及面積三千平方米。苦主彭婆婆報警求助，警方聯同多個政府部門雖然親眼目擊泥頭車出出入入傾倒泥頭，不過冇出手阻止。放任傾倒泥頭都未算絕，規劃署竟然要求彭婆婆將土地還原，否則提出檢控，罰款可達五十萬元！

呢嗱，你真係唔怪得香港人咁多怨氣㗎，糊塗官僚一來縱容加害者，二來懲罰受害者，完全係顛倒是非、黑白不分，冇怨氣嗰個，應該唔係正常人。

講到呢度，功夫茶諗起一個慘無人道嘅古仔。沙特阿拉伯前年發生一宗輪姦案，七個男人侵犯一個女人，受害者竟然被法官認定係「咎由自取」，因為當地法例規定，女人唔可以同陌生男人同坐一車，所以判處笞刑九十鞭。遇到咁唔合理嘅瘋狂判決，受害者提出上訴。吖，仲慘，法官惱羞成怒，將刑罰加重至監禁六個月兼笞刑二百鞭，理由係佢企圖利用傳媒影響司法。

計功夫茶話齋，泥頭車未經准許出出入入，擅闖農田傾倒泥頭其實同強姦差不多，甚至可以話係輪姦。

至於冇出手阻止嘅糊塗官僚，咪就縱容強姦嘅幫兇囉。檢控受害者嘅規劃署咯喎，應該有資格去中東做法官，將強姦受害者係咁鞭呀鞭，鞭完仲要掟入黑牢。

話時話，點解咁多個政府部門都唔理傾倒泥頭破壞環境呢？原來法例有一個好大好大嘅漏洞，政府係冇權過問「私人土地」嘅。

喂，你話係咪荒謬絕倫吖？照咁講，變態佬擅闖「私人土地」強姦民女都得㗎啦，唔通警察就唔受理咯喎？

其實好簡單嘅啫，修例堵塞漏洞囉，如果唔係，曾蔭權唔止係「保育逃犯」，簡直係「色魔從犯」！