本文重點
豬流感確診個案不斷增加，在社區擴散，身為家庭醫學專科醫生嘅李國棟，在診症時都多次遇過豬流感個案，首先將病人隔離，如果病情嚴重，就會安排救護車將病人送院治理。李醫生尋日以智經基金理事出席基金一個記者會時話，豬流感疫情發展到呢個地步，即使病人有輕微流感徵狀，都毋須進一步檢驗，已經將豬流感視作普通流感，而佢本人亦無特別防禦措施，只喺診症時戴口罩，回家後立即沖涼殺菌。
有人話豬流感不及○三年沙士咁嚴重，連防禦措施都無得比，李醫生都好有同感。佢憶述，○三年沙士爆發，大家都唔知道究竟係乜嘢病症，為咗家人安全起見，曾經入住中環麗嘉酒店兩個月自我隔離，期間只係間中與太太見吓面。麗嘉酒店在清拆前係高級酒店，但李醫生話，酒店在沙士期間生意慘淡，連同他在內只租出七間房，減價後一晚房租只係幾百元，好抵住！
肥胡開學堂教政治
李醫生尋日拍住智經主席、醫管局主席胡定旭等基金核心，出來發表一項名為「香港消費者信心」嘅意見調查，之後同傳媒聚會，調查喺六月上旬訪問咗一千零三十人，逾一半被訪者認為未來一年經濟會好轉，亦有半數認為整體就業情況未來一年會得以改善；呢個「智經香港消費者信心指數」以後每季度會做一次。
肥胡尋日又順便介紹智經學堂進度。名叫學堂，其實喺智經會址上堂，學員約四十人，以智經之友為主，第一階段政治專題演講系列六月結束，第二階段係上堂授課，講解政府運作、選舉工程同危機處理，唔排除請高官現身說法添。