會計界立法會議員陳茂波（阿Paul）早前喺平反六四動議上慷慨陳辭，聲淚俱下，又同泛民主派一齊企起身默哀，但到最後一刻又投咗棄權票，令建制派同泛民都大嘆估佢唔到。阿Paul尋日同傳媒自辯，話事後收到嘅絕大部分意見，都讚佢做得好恰當，西環亦冇搵佢秋後算帳，但佢亦因而收到有生以來第一封恐嚇信，鬧佢係民族罪人，仲話要佢死無全屍，最後要報警處理。不過佢相信寄信人只係口輕輕講吓，自己只會一笑置之，毋須大驚小怪勞動警方加強保安喎。
阿Paul又透露，佢喺英國牛津大學讀法律嘅囝囝最近返咗嚟香港，早前經佢安排下跟咗立法會議員陳淑莊嘅師傅、出名打刑事案嘅資深大律師王正宇學嘢，依家就轉咗去全港擁有最多資深大律師、以打民事案見稱嘅Temple Chambers做實習，月底又會一家大細去意大利輕鬆吓，由北部玩到南部。無論係讀書做嘢以至旅遊，都同個仔諗得咁周到，真係廿四孝老竇！