其實心水清嘅都會知道呢單嘢嘅發起人就係旅遊界立法會議員謝偉俊（Paul），當年佢爆冷打低有自由黨撐腰嘅旅議會總幹事董耀中當選，即刻拋出取締旅議會嘅建議，又同旅議會主席何栢霆喺會議旁聽員身份上爭拗，一早已有牙齒印。

尋日阿Paul喺立法會經濟事務委員會又繼續出招，搵埋一班志同道合嘅業界代表，下下「啄」住有自由黨背景嘅董耀中同何栢霆，重提當年何氏不避嫌出晒面同阿董拉票嘅舊事，仲拉埋喺自由黨拆夥後自立門戶嘅經濟動力胡兆英落水，話佢年底又出來選主席，揶揄旅議會已被某政黨政治侵蝕。

會議去到尾段，葉劉淑儀出手，提出動議要求重新檢討旅議會工作，謝偉俊當然和應，原本在場嘅自由黨議員方剛可能自知單人匹馬難以對抗，隨即快閃，民主黨李華明又唔見咗人，結果議案得番八個人投票；雖然民建聯嘅李慧琼一語道破，話件事已經淪為政治角力，但佢同陳鑑林都投埋支持票，連工聯會、公民黨同社民連都附和，於是喺無人反對、無人棄權嘅情況下通過，莫非大家都槍頭對準自由黨？