一班市民參加七一遊行後在政府總部聚集唔肯走，行政署玩落閘，禁止任何人出入之餘，亦禁止大小二便，仲累及喺西座工作嘅立法會議員助理無得放工，議員於是去信投訴。行政署署長麥綺明尋日親身出席立法會行政管理委員會會議，向受影響嘅議員及議員助理道歉，承認當日嘅安排不周全，並向議員提供一個廿四小時嘅緊急電話，寫包單一定會有職員接聽。
七一遊行之前，政府總部西座被「綠色和平」四名成員潛入，在外牆掛上巨幅「氣候逃犯」煲呔曾嘅通緝令，加上市民在七一遊行後在政府總部聚集，導致行政署突然收緊政府合署西座出入口保安，訪客要登記身份證及查明到訪原因，記者仲慘，要一併出示記者證，相當擾民。其實政府總部搞到雞犬不寧，都係拜煲呔曾所賜。麥綺明尋日就承諾，會逐步放寬政府總部出入安排，只係登記身份證就入得嘞喎！