最低工資爭拗由社會帶入立法會，最低工資條例草案委員會成為新戰場，正反陣營傾巢而出，爭奪主導權，最終令委員會人數高達三十六人，其中工商專業界有十二個，勞工界有七人，如以政治光譜劃分，建制派同民主派形成二對一之比，形勢都幾懸殊。

委員會尋日開會選正、副主席，早前傳過職工盟李卓人想爭，但結果由大熱、擁有工聯會背景嘅譚耀宗做主席，競選時承諾撐最低工資嘅會計界陳茂波任副主席，建制派都算小心，見副主席有機會代替主席主持會議，連呢個機會都唔畀泛民。呢個正、副主席組合，工商界應該好放心。

十月先開下一次會

工商專業界議員空群出洞，入委員會擔櫈仔，不過，唔代表佢哋好恨開會。選完主席，傾下次開會日期，勞工界同泛民要求七月尾開波，九月初叫官員嚟交代立法內容。不過，總商會代表林健鋒、工業總會代表梁君彥同飲食界張宇人，就有唔同諗法，話八月、九月多議員外遊叉電同考察，不如十月至開會，一氣呵成；張宇人直頭講，十月咁多活動，不如過咗十一先至開會啦。咁都得？張宇人同林健鋒、梁君彥去年選舉後各行各路，今次站在同一陣線，都算難得一見囉。

面對商界擺明車馬玩拖字訣，拖得幾耐得幾耐，泛民同勞工界條氣梗係頂住啦，話唔明點解審議草案同十一有乜關係，又指咁遲開會，外界以為立法會對立法放軟手腳。不過，講到底，議會嘅遊戲規則，係票多手瓜硬，最終委員會敲定，九月廿四日復會，十月七日聽公眾意見。民主派自知形勢比人弱，亦無再爭持落去，橫豎已向選民交足戲，暑假疊埋心水放假攤抖。

臨時最低工資委員會委員鄺志堅，睇到立法會呢一幕，對最低工資立法即時冷咗半截。佢話政府統計處明年初會得出最低工資數據，原本寄望明年中立法會完成審議條例草案後，經半年寬限期，二○一一年初可以正式實施；依家商界拖得就拖，能否如期喺明年中完成審議，真係唔多樂觀。