以香港富豪二、三代為骨幹嘅香港青年聯會，前晚喺灣仔會址召開換屆後首次常董會議，新主席陳仲尼會後自掏荷包，設慰勞宴，喺會址對面嘅世紀香港酒店咖啡室包半場，開完常董會行過對面醫肚，貪佢夠就腳。卓妮聞風而至，果然好熱鬧，富豪二代雲集，霍啟剛同啟山兩兄弟、觀瀾湖太子爺朱鼎健（Ken）、邱德根幼子邱達根、莊士集團太子爺莊家彬同全國人大常委范徐麗泰兒子范駿華坐埋共商大事，部署青聯換形象、搬新竇、搞研調，大展拳腳。
香港青聯喺九二年由已故全國政協副主席霍英東兒子霍震寰成立，轉眼嚟到第十七屆，近年轉趨高調，新領導班子九名副主席各有分工，霍老長孫啟剛負責文化體育，嚟緊重頭戲係幫手宣傳東亞運；「彤叔」鄭裕彤長孫鄭志剛拍住常務副主席葉振都一齊搞學界事務，青聯暑期實習計劃搞咗三年，明年再接再勵；Ken朱發展會員事務，非常認真；齋睇范駿華特登返屋企換番套便服嚟開會、副司庫嘅莊家彬前晚風塵僕僕由山西太原視察完房地產業務，都要坐飛機到廣州，再轉私家車返港，都係為趕返嚟出席聚餐，就知佢哋真係想有一番作為！
陳仲尼捐出七位數字
本身係金鷹集團主席嘅陳仲尼，同卓妮分享青聯未來大計。首先係搬會址。佢哋打算向政府申請租用柴灣青少年中心一個二千呎單位，方便發展會務；第二，破天荒成立政策研究委員會，由內地「三毛之父」張樂平外孫詹勝做秘書長，搵學者做重大政策研究兼辦論壇，頭炮係下月搞三通後香港形勢論壇，請兩岸三地官員出席，呢類活動，動輒幾十萬元經費，好在富豪二代夠底厚，講明邊個揸莊項目，就要承包資助，夠晒承擔，陳仲尼更加拍心口，今年至少捐七位數字，推動會務，Ken朱亦承諾力撐青聯，數目就唔講嘞，總之大家有錢出錢，有力出力啦，好似青聯八月中開集思會，觀瀾湖包起所有食住費用。
屬下團體成員逾三萬
聽Ken朱介紹，青聯有會員一千二百人，連屬下團體成員超過三萬人，規模持續擴大。Ken朱無講大話，現場所見，葉振都同做副秘書長嘅范駿華，同班青年人圍埋傾緊青聯今年暑假實習計劃，下星期分別上北京、上海同大連，參加當地實習學生嘅歡迎會，啟山仲即席被拉落水，入埋學界委員會。呢班實習學生成立咗個學生交流網絡，做青聯屬會；換句話講，青聯新血以後源源不絕，好有睇頭！
卓妮