好多人細細個讀書嘅時候，學校連煙仔都未見過，莫講話害人不淺嘅毒品。點解家陣校園吸毒問題嚴重成咁？一個好主要嘅原因係政府執法不力，任由毒禍侵襲校園，形成吸毒年齡小學化，有學生七歲就索Ｋ。

好嘞，曾蔭權終於知衰嘞，前排出席立法會答問大會嘅時候，開宗明義第一句就宣布親自督導反青少年吸毒工作。亦即係話，煲呔曾繼擔任「全港掃街大隊長」之後，今次自封「全港掃毒大隊長」。

由特區之首拍心口帶隊掃毒，本來都算係好事，遲到點都好過冇到。問題係，煲呔曾似乎冇乜信心，佢話喎，摸着石頭過河，救得一個得一個。大家周不時都聽見有人咁講啦，有信心未必會贏，冇信心一定會輸。曾蔭權呢個反青少年吸毒工作會唔會成功？講真，確係幾難令人樂觀。

「東方報業民意調查」結果顯示，四成六受訪者認為，青少年吸毒情況非常嚴重；兩成九覺得頗為嚴重；一成九認為嚴重。

同時咯喎，三成七不滿政府禁毒宣傳以及打擊工作講多過做；兩成七認為戒毒服務支援不足；兩成二狠批當局打擊吸毒問題手軟。

提到戒毒服務支援不足，正生書院嘅遷校風波就係一個慘痛教訓。喂，正生書院話要遷校，希望搬去梅窩，講咗幾年㗎喇，如果政府係積極處理嘅，點會搞到校長好似推銷員咁樣周圍游說？點會搞到學生好似殺人犯咁樣受盡白眼？點會搞到梅窩街坊好似牛魔王咁樣炒蝦拆蟹？正正因為政府對於正生書院一直闊佬懶理，終於搞出大頭佛。

事實上，青少年吸毒問題由來已久，曾蔭權家陣先至話要出手，三成八受訪者不滿佢嘅態度怠慢；兩成九認為佢反應遲鈍；兩成覺得，反映早前成立嘅青少年毒品問題專責小組成效存疑。

對於煲呔曾嘅「摸着石頭過河」，民眾又點睇呢？三成九受訪者認為，反映當局以往愛理不理；兩成五表示政府束手無策；一成九質疑冇信心改善問題。

咦，咪住先，雖然話摸石過河啫，曾蔭權假假地都拋出「禁毒新五招」喎，分別係社會動員、社區支援、測檢、康復同埋執法，未至於完全冇用啩。弊就弊在，名義上係新，實際上係舊，所以三成二受訪者認為，最重要係盡快實施校本自願驗毒計劃；兩成四批評新措施係炒冷飯，新意欠奉；兩成二直斥內容空泛；一成七相信措施只係雷聲大雨點小。

計功夫茶話齋，反吸毒同清潔香港其實差不多，都係長期抗戰，唔可以三分鐘熱度。曾蔭權當初掃街，掃兩嘢就算，家陣衞生黑點多到嚇死人，老鼠甚至肥過貓。煲呔曾呢鋪轉行掃毒，勝算有幾高？畀晒面都只係四個字：輸少當贏。