查實伍博士已經有多個學士、碩士，甚至博士學位，涉及範疇包括工程學、法律、工商管理，甚至連佛學都有。唔單止學位多，伍博士公職亦都唔少，佢係理工大學嘅校董會副主席、職業訓練局副主席、職業安全健康局主席、香港品質保證局主席及香港科技園董事。

伍博士又話，依家九成嘅時間都花咗喺公職上，自己公司嘅嘢反而少咗去理。工作多咗，又要出席唔同活動，伍博士話依家返到屋企都無咩特別嘢會搞喇，唯一放鬆自己嘅方法，就係「聽電視」。點解係「聽」唔係「睇」？伍博士話，查實佢對電視節目都無咩興趣，只係太太鍾意睇，自己都被迫聽到啲內容。伍博士咁多公職在身，夠晒攰，返到屋企瞌埋眼聽電視，都未嘗唔係好好嘅休息方法吖。