全球最細嘅香港迪士尼樂園擴建問題終告一段落，一向語出驚人嘅商務及經濟發展局局長劉吳惠蘭成日話，喺成件事上已經幫港人爭取最大嘅利益，仲表明喺美國同華特迪士尼商討時，已經強烈反對上海起迪士尼，點知佢尋日接受電台訪問，竟然一百八十度轉軚，話睇番美國東、西岸都可以各有一間迪士尼樂園，證明中國都有條件容納兩個迪士尼，香港嗰間仲可以有示範作用添。呢頭擴建撥款到手，嗰頭就改晒口風！
劉吳惠蘭尋日仲自爆，原來佢做第一份工，就已經一腳踏兩船。話說佢一九七六年大學畢業，受自己一位好老師影響，佢應徵去做教師，但係佢呢頭應承咗一間學校教書，嗰頭又答應加入政府做政務官。於是乎喺開學嘅第一日，佢第一件事就係同校長講拜拜，話抱歉要辭職，因為自己下個月要加入政府，要辭職啱啱好喺一個月前通知。佢仲話自己有個使命，就係好好服務市民喎。
呢位新任老師如此騎牛搵馬，校長一定好嬲喇，唔知佢應徵做教書時，有冇同校長講過，佢嘅使命係乜乜乜呢？