恭喜賀喜！港交所主席夏佳理（Ron）又做外父喇！阿Ron嘅大女阿Kim下個月拉埋天窗，仲會遠赴印尼舉行婚禮添。不過講開要喺印尼行禮，阿Ron就有啲唔明，佢話大仔結婚時，因為新抱係菲律賓人，所以當年喺菲律賓行禮都好合理，但繼女徐文玠○四年同Van Cleef & Arpels高層Benjamin Vuchot結婚，兩公婆明明住喺香港，但最後都決定喺意大利舉行婚禮，令佢大惑不解。
依家連阿Kim都唔喺香港行禮，阿Ron無奈道：「我都唔明啲後生點諗，不過做老竇冇計啦，唯一可以做嘅咪係磅水囉！」阿Ron雖然口講唔鍾意四圍騰參加仔女嘅婚禮，但其實佢骨子裏都不知幾享受為屋企人飛嚟飛去。
好似今個暑假阿Ron因為工作忙，安排唔到放長假，不過佢依然抽時間去菲律賓探大仔，再趕返香港開會，然後又陪老婆夏安麗返奧地利外家，接住返香港做嘢，到八月再去印尼參加阿Kim嘅婚禮。單睇呢個「暑期行程表」，就知阿Ron係廿四孝老公兼好爸爸啦。