立法會表現未盡人意，包括本報在內嘅傳媒都爭相做統計，議員無論喺立法會、財務委員會同內務委員會嘅出勤率又被指差強人意，今年呢張成績表，認真麻麻哋。議員劉健儀（Miriam）、鐵頭仁何俊仁、劉江華等議員，尋日應邀上《城市論壇》，就立法會過去一年表現畀分，議員彈高官彈得多，平日伶牙俐齒，連珠炮發，但係要彈自己友，即時變晒濕水炮仗。

為蛇王黨友開脫

主持人問大家，點睇有議員長期做「蛇王」，唔少市民都想聽吓佢哋點樣規勸同僚痛定思痛，做番台好戲，唔好辜負市民期望同浪費公帑。不過，鐵頭仁只顧為自己個黨賣膏藥，數自己友做過啲乜，又話立法會唔係普選產生，喺分組點票制度下，功能組別議員輕易否決民主派嘅議案，言下之意係難怪議員表現唔理想，包括喺議事堂掟蕉、掃枱、講粗口。

劉江華就以略帶感慨嘅口脗話，好多時喺立法會前廳聽到同僚呻，話喺立法會工作，有浪費青春嘅感覺，意思係指泛民議政，動輒與普選掛鈎，無普選就乜都無得傾，佢奉勸泛民放下心結，佢仲叫建制派同僚唔好灰心，要努力搞好民生咁話。

Miriam就比較中肯啲，提醒同僚要為自己嘅言行同表現負責，市民會盯實大家。不過，Miriam點到即止，批評不痛不癢，議員狠批唔使本，唔使咁吝嗇喎。

根據《基本法》，行政機關要向立法機關負責，所以立法會議員可以聲大大批評官員，咁議員又向邊個負責呢？咪就係選民囉！做議員做到肆無忌憚、做大懶蛇，選民嘅眼睛係雪亮嘅，二○一二年再選舉，咪睇吓點囉。