愛美係女人嘅天性，所以女士不論幾忙總會抽啲時間去置裝，等自己永遠以最靚嘅一面示人。立法會前秘書長馮載祥嘅太太馮馬潔嫻（Jenny），本身係香港殘疾人士體育協會主席，近日忙住為八月中舉行嘅第三屆亞太區硬地滾球錦標賽做準備，Jenny話，由於呢個比賽係殘奧會認可嘅計分賽事之一，賽果會直接影響倫敦奧運嘅入場排名，所以佢哋事前準備工夫一定要做到足。
不過Jenny點忙都抽到時間去shopping，卓妮尋日喺金鐘廊，就見到佢好忙咁喺舉行緊「最後減價」嘅舖頭之間穿梭，手上仲攞住戰利品。佢笑言，女人要行街行得開心自在，最緊要係識得「撇甩老公」，佢話，男人多數都冇耐性陪女士行街，行一陣就會開始問「買完未？走得未？」所以佢索性留低老公同囝囝喺屋企打網球，等自己可以獨自享受shopping嘅樂趣。
Jenny尋日仲化身精明師奶，見到鞋店買三對鞋有八五折，即時唔執輸揀番三對，買完放晒落個大手袋度，唔知係咪唔想老公知佢買咁多嘢呢？
卓妮