去年陸續上任嘅一班副局長同政治助理，上任都差不多一年，各人表現大家心中有數，不過身形變化則各有不同。早兩日喺一個酒會上，卓妮遇到民政事務局副局長許曉暉（Florence），佢嘅身形顯然又比早前瘦咗一個碼，一再顯示佢產後修身成功。
Florence可以話係最後幾位履新嘅副局政助之一，事關去年五月佢接受委任時仍然腹大便便，出嚟見記者都係大住個肚。由佢生完個女、坐完月十月中履新，到依家已經有大半年，嗰日見到佢，絕對稱得上係修身成功。Florence笑笑口話，佢瘦身秘訣係工作同埋保持心境開朗，即係唔肯將秘方公諸同好啫！
暑假又到，身為兩女之母嘅Florence今年唔打算出埠，一來小朋友仲細，二來佢都好忙，所以連放長假都未必啦，最多放幾日短假，抽空陪吓小朋友，都算係廿四孝媽媽啦！
話時話，副局、政助上任近一年，四面八方傳來嘅批評同意見中，以許曉暉較為正面，大家話佢好願意同人溝通，傾起嚟又好親切，幾啱做民政呢瓣。
卓妮