貧窮本身固然係冇藥醫啦，唯一解決辦法係努力工作賺錢致富。千祈唔好學人去打劫脫貧喎，前幾日有個笨賊搶手袋，點知畀個神勇婆婆追到氣咳，結果慌不擇路，砰嘭一嘢跌落街，瓜咗。

人窮冇藥醫仲有另外一個意思，就係當你貧無立錐之地嘅時候，千祈唔好病，記住保重身體，因為你有機會冇錢買藥。

咦，咪住先，醫管局係就係搞咗一套藥物名冊制度，如果病人要用到貴價藥物，必須自己畀錢買，之不過咁，醫管局又誓神劈願承諾過，香港係有一個安全網嘅，唔會出現「冇錢冇藥醫」嘅情況。照咁睇，即使係窮到燶嘅病人，應該都係有藥醫咯喎。

唉，齋講冇用，不如睇下真實個案。

七十三歲嘅杜四妹兩年前患上肺癌，接受傳統醫療方法始終未見好轉，肺腫瘤大過雞蛋，壓到杜婆婆好辛苦。然後醫生就建議嘞，不如試下用新嘅標靶藥，不過好貴㗎，每個月要一萬八千幾蚊。

杜婆婆算係好福氣㗎喇，三個仔女雖然都係草根階層，收入非常微薄，生活捉襟見肘，但係都願意傾盡全力為阿媽籌錢買藥。吖，貴嘢的確係好嘢，用咗標靶藥後情況果然有改善。問題係，一兩個月就話勉勉強強頂得順啫，長此以往每個月攞成兩萬銀出嚟買藥，窮等人家點負擔呀？於是乎，藥費支付唔起，杜婆婆已經斷藥幾個月嘞，佢好落寞咁話：「依家冇藥食，日日好似等死咁！」

杜婆婆嘅孝順仔走去問醫管局，又走去問社會福利署，一個二個耍手擰頭，冇人幫到佢。孝順仔吳先生係咁講嘅：「明明有藥都買唔到，唔通窮人就冇資格長命啲？點解香港會搞成咁！」

係囉，功夫茶都想知，點解會搞成咁？冇耐之前之嘛，旺角奪命大車禍有個傷者入咗伊利沙伯醫院，院方膽敢死收人二萬銀先至肯用貴價止血藥，好彩人哋畀得起啫，更加好彩嘅係，經過傳媒揭發呢宗「先錢後醫」嘅醜聞之後，醫管局知衰嘞，速速回水。為咗補鑊，醫管局發出指引，但凡傷病者有即時生命危險，用任何藥一律免費。

好嘞，講番杜婆婆，好明顯醫管局唔覺得肺癌係有即時生命危險，所以唔肯免費贈藥。講到呢度，大家同唔同意人窮冇藥醫？

功夫茶腦海突然響起一首音樂，一首粵語長片經常聽到嘅小提琴演奏，仲見到張活游嘔血嘔到甩肺，白燕攬住個空米缸欲哭無淚，兩公婆明知冇錢醫病，仍然死頂話要供馮寶寶讀書。

估唔到二十一世紀嘅香港仍然會出現冇錢醫病嘅粵語片橋段，借問聲，醫管局有冇人性㗎！