立法會前日表決兩項有關落實政府債券計劃嘅決議案，絕大部分黨派其實都原則上支持發債，只有個別泛民主派對決議案嘅細節內容提出異議。不過政府依然非常緊張，早於上星期五開始，已不斷急Call建制派議員，聲稱兩項決議案嘅票數都好緊張，希望佢哋喺當日下午六點四十五分後，坐定定喺立法會大樓等投票撐政府。

正所謂出得嚟行，預咗要還，個名叫得做建制派，自然要喺政府有難時現身護航，部分議員被迫臨時取消原來嘅晚宴安排，身在新加坡主持亞青運動會閉幕禮嘅體育界議員霍震霆，更加要臨時提早上機趕返香港。政府方面亦派出大批公務員狗仔隊落立法會箍票，實建制派出入食飯同去廁所。

借金融風暴幫自己貼金

點知首項決議案嘅表決結果，居然有四十票贊成，只有十三票反對，立即引起建制派嘩然，質疑鬍鬚曾心虛亂Call佢哋返嚟撐場。霍震霆同自由黨張宇人等人，仲好似好不滿咁立即執嘢走，導致喺短短四十五分鐘後表決嘅另一項官債決議案，無緣無故少咗五張贊成票。有建制派議員更加私下表示，以後鬍鬚曾再搵佢哋箍票，佢一定會再三諗清諗楚先，以免又畀政府玩多鑊！

最離譜係，鬍鬚曾尋日回應七一遊行動議時，難委佢仲敢借金融風暴幫自己貼金：「我並不是要自吹自擂，誇耀我們對抗金融風暴嘅成績；相反在過去一年內，我們幾乎每日都喺度反省……」班無喇喇畀佢Call返立法會嘅建制派議員聽到，肯定又會㷫多幾錢重，估計鬍鬚曾明年嗰份預算案，反對票數又會再創新高。