本文重點
新加坡航空公司首次引入全球最大嘅A380空中巴士，飛來往香港同新加坡嘅航線，尋日喺機場舉行首航典禮，卓妮都去湊吓熱鬧，發現呢架「空中巨無霸」吸引咗一班貴客去捧場，包括信和置業主席黃志祥（Robert）同旅遊界立法會議員謝偉俊（阿Paul，圖）。信置主席黃志祥喺香港做地產為主，其實本身係地道新加坡人，爸爸黃廷方就係新加坡遠東集團嘅創辦人，同時又係星洲大地主，所以黃志祥不時都會飛去新加坡巡視業務兼探望爸爸，今次仲成為A380首航嘅捧場客。
Robert雖然貴為富豪，但凡事親力親為，卓妮見佢一手拖住個篋，一手拎住兩袋嘢準備登機，完全沒有架子；新航香港區總經理Campbell Wilson見到，立即上前招呼Robert，傾咗幾句就同Robert一齊喺頭等艙通道登機。
阿Paul慳家揀經濟位
至於阿Paul就純粹去捧場。尋日係立法會大會煞科日，阿Paul話幾忙都要趕過嚟出席呢件業界盛事。阿Paul無跟機飛去新加坡，仲實話實說，話以後唔會特登揀A380嚟搭。就算有機會搭，都只會坐經濟客位，慳得就慳嘛；當然，有人請就另作別論，果然係精打細算，唔怪得盛傳白姐姐搵佢做財政大臣喇！