鬍鬚曾近日在立法會財委會再大膽預測：可能我哋見到嘅已經係最壞情況，逐漸見到經濟復甦嘅曙光。稍有點經濟常識的人都知道，樓市、股市小陽春只是假象，學者話香港人仲有排捱，估計第二季的經濟數字可能更差，下滑速度最快在下半年開始放緩，但距離真正復甦還有一段時間。

一場人類豬流感，政府手忙腳亂，封酒店十四日成為史上對付豬流感的最強手段，揚名全世界，然而，卻自我打沉旅遊業。七月一日起，禁煙條例伸向全港各大酒吧、夜總會、桑拿、麻雀館一律禁煙，不理業界實際的訴求，一味不顧現實的吹噓：禁煙唔會影響生意。一如市區的士嘅「短加長減」，又係強指的士司機收入多咗，而業界經調查後卻苦着臉說：收入不增反減。

政府施政只向鴕鳥學習，完全唔肯面對現實，明明擾民，卻死撐政策正確，試問如何印證「民心，我心」？施政畢竟不是做學術研究，只埋首故紙堆即可搞出亮麗的成績；請步出官邸，去一些舊區如深水埗、油麻地、大窩口等微服巡視一下，在街市與買餸的師奶交談、在路上與拾紙皮的阿婆傾多兩句、在茶餐廳聽阿茂叔積埋幾多怨氣……鬍鬚曾，你要找出來的「三無人士」喺晒度啦！

時代變了！社會學家約翰‧舍伍德說：「過去女人接受教育是嫁一個醫生，而現在則會選擇做一個醫生。」鬍鬚曾，你就算唔選擇做一個先知，那你起碼也不可以只做一個「有斷估冇痛苦」的妄想專家！