立法會議員何俊仁年前喺中環鬧市畀兇徒扑頭，扑到連棍都斷埋，畀人幫佢改咗個花名叫做「鐵頭仁」。前日佢又喺立法會答問大會先後畀議員揶揄，笑佢自扑頭事件後視力、聽覺、記憶力以至智力都大不如前，真係禍不單行。不過佢都冇怨天尤人，尋日仲自爆經常借錢畀人，但成日都唔記得追人還，蝕晒底。
最近幾年嘅暑假，鐵頭仁話自己唔係忙公務就係忙打官司，已經好耐冇去外遊，今年暑假會考慮出去行吓，但首先要去台灣一轉，仲一去就去晒台北同高雄，不過此行並非去玩，而係應當地雷曼苦主邀請，講解香港處理雷曼事件嘅最新情況。
原來台灣都有兩、三萬名雷曼苦主，大部分都係透過台灣金融機構嘅香港分行買雷曼。由於並非直接喺台灣銷售，加上當地政客唔熟悉呢類複雜金融問題，好多連英文章程都唔識睇，令呢班台灣雷曼苦主求助無門，最後搞到要越洋搵鐵頭仁，睇嚟鐵頭仁今次外遊計劃都係凍過水！