本文重點
港府對抗人類豬流感疫情，由初期嚴陣以待到現在病者自行家居隔離，有意見認為港府處理手法過分緊張，過程中令好多人受影響。尋日卓妮喺香港會撞到經營語言中心嘅前勞工處助理處長周東山，佢對住卓妮猛呻話，豬流感爆發初期，港府緊張，搞到市民都緊張埋，唔敢畀子女參加課餘活動，令佢間學校生意額大跌四成，幾經艱苦總算捱到依家暑假，但有啲行家就唔好彩嘞，捱唔住要被迫結業。
新疆暴亂 交流計劃受阻
周東山認為現時嘅致命個案，與普通流感差不多，而咁耐以來，人類同流感互相適應，呢個係自然過程。周東山又話，港府決定提早放暑假都有好處，事關家長唔想子女放假無所事事，會讓子女參加課餘活動，令佢間學校生意回升，加上有行家結業，部分生意亦流向佢間學校，都算係好彩囉。
世事多變，就算唔係發生疫情，都可能有其他事發生。好似新疆烏魯木齊發生種族暴亂，旅遊業幾近停頓，就連民間交流計劃都要中止。工聯會及教育工作者聯會原定本月廿二日帶領一班英文教師到新疆交流，但由於當地局勢未明，基於安全為由，交流團被迫要腰斬，白白錯失咗暑假檔期。
卓妮