本文重點
工總新一屆理事會尋日選出六名正、副主席，一如所料，孫啟烈（Cliff）接棒做大當家，副主席粒粒有名堂，好似「電鑽大王」鍾志平同李錦記第四代後人嘅李惠民咁，事後成班理事聚首一堂，身兼留任董事嘅自由黨前主席田北俊、以及離開自由黨後同林健鋒、梁劉柔芬合組經濟動力嘅梁君彥（Andrew），好似孖公仔咁坐喺最前排，坐正工總核心隔籬，不時有傾有講添，令人有走入時光隧道嘅感覺，唔通田少想叫Andrew回巢？
田少話，今次特登嚟捧孫啟烈場，別無其他。不過，Cliff唔係咁諗，佢對卓妮吐心聲，話自己係自由黨常委，最近做埋經濟動力成員，其實係想當紅娘拉線，有朝一日撮合Andrew三個重返自由黨，所以佢做工總主席，特登留田少喺工總做留任董事。佢話，自由黨分家後兩邊都代表唔到成個工商界，「都係以前喺立法會有十票最好」。我哋問Andrew，Cliff嘅願望有冇機會成真？Andrew話：「一步步嚟啦！」睇嚟Cliff嘅一片苦心，未必會白費喎。
股海翻波 鍾志平當買經驗
金融海嘯令股海翻波，城中富豪聞Accumulator色變，「電鑽大王」、創科實業創辦人鍾志平都中咗招，佢直言最初以為玩Accumulator嘅賺蝕會喺一、兩成之間，點知可以插水七、八成咁驚人，好彩對生活無影響，依然笑住過日子，當買個經驗囉。鍾志平笑言，已經調整投資策略，「投資喺自己身上，食落肚、讀書學到嘅嘢，永遠都唔會被人偷走。」
工總另一位新鮮出爐副主席李錦記董事李惠民話，金融海嘯對家族醬油生意影響唔大，李錦記去到佢呢代已經第四代，佢同爸爸平時好少傾生意經，傾去玩去食就有喎。
卓妮