道路下面要有坑渠，作用當然係去水，否則好容易水浸。所以話啫，千祈唔好睇小渠務署，因為呢個超級通渠佬可以話係掌握全香港嘅經濟命脈，如果每逢大雨例必水浸，經濟損失大到嚇死人。

舉一個例子吖，上環永樂街係出晒名嘅海味街，同時亦係惡名昭彰嘅水浸黑點。每逢大雨咯喎，永樂街變身永樂河，名貴嘅鮑參翅肚即刻淪為水上飄，飄呀飄，飄呀飄，飄到東主一殼眼淚。

除咗永樂街之外，仲有冇其他水浸黑點呢？嘩！唔講大家可能又係唔知，原來全港總共有二十二個水浸黑點，重災區係大埔，區內有六個黑點。重災區之中嘅重災區，就係大埔林村嘞，嚴重程度達到四級。至於洞梓路、汀角路以及南華莆，災情都相當嚴重，分別被列入二至三級。

據洞梓路圍下村村民講，受到水浸問題困擾咗好耐，餐餐落大雨都會水深及膝。水浸期間，的士同小巴都唔肯入村，因為怕死火。村民就慘咯，出出入入被迫涉水步行。

洞梓路嘅水浸問題到底困擾咗幾耐呢？唔講大家可能真係唔知，原來早於一九九四年，洞梓路已經被列入水浸黑點。換言之，渠務署足足拖咗十五年，問題仍然未解決！

確係唔到你唔服，回歸前拖到回歸後，上世紀拖到下世紀，曾蔭權冇做好呢份工，渠務署冇通好呢條渠。

講到冇通好呢條渠，功夫茶最擔心嘅係大嶼山嘅大澳。大家應該仲記得，舊年四川大地震之後，香港又遇到颱風黑格比襲擊，大澳出現嚴重水浸，斷水斷糧又斷路，搞到曾蔭權要搭直升機去視察災情。今年四川都重建嘞，大澳有冇改善？係就係有防洪工程嘅，不過進度慢吞吞，水浸重災區永安街旁邊嘅河道築堤防止海水倒灌工程，要等到二○一一年先至有望完工。

喂，家陣嘅天氣好得人驚㗎，淨係睇下舊年嘅降雨量吖，全年落咗三千幾毫米，比正常多出百分之二十九。今年風季雨季睇怕都係多災多難，如果渠務署繼續懶懶閒，視察災情嘅煲呔曾飛完大澳又要飛去大埔，非常之咁奔波勞碌啫！

咁就唔該全港通渠佬一哥，渠務署署長劉家強醒少少嘞。劉署長，閣下嘅老細曾蔭權近排好煩好亂，七一示威又有咁多人上街遊行，連警隊都話有意圖上街，唔該你通好條渠啦，當係以民為本、福為民開又好，當係食君之祿、擔君之憂都好，唔好害到老細頻頻撲撲安撫水浸災民吖嘛。你知啦，災民一旦恨綿綿，煲呔一定會失眠，到時咯喎，劉署長都要受靶㗎咋！