政府趁今日七一之前，推出擴建香港迪士尼樂園嘅計劃，質咗立法會經濟發展事務委員會主席林健鋒（Jeffrey）食死貓，要佢召開一個無文件兼無議程嘅會議，搞到佢畀議員狂插。尋日委員會開會討論迪士尼擴建，Jeffrey表現得一啲都冇嬲政府，仲兩次搶答，幫政府答問題添。
有議員唔明白點解政府為咗今次擴建，會令到政府手握樂園嘅股份，由依家五成七跌到五成二，究竟條數係點計？點知經濟發展局局長劉吳惠蘭都未嚟得切反應，Jeffrey已經搶答，並且將條數以清晰易明嘅方法加一次畀大家聽，即時令到Rita口啞啞。
跟住又有議員批評三個新嘅主題園區之中，有一個係以動畫《反斗奇兵》做主題，不過呢齣動畫已經有十年歷史，加埋擴建工程嘅五年，咪變相落伍咗十五年囉？Jeffrey又忍唔住幫口話有時啲嘢係愈老愈可愛，《變形金剛》已經有卅年歷史，套電影都係依家先上畫，但已經係今年最賣座嘅電影啦！