青少年濫藥成風，少女援交搵快錢，對前途迷惘，情況令人憂慮。講過退休後唔打工嘅前警務處副處長馮兆元，被香港青少年發展聯會主席陳振彬（Bunny）誠意打動，出山做大義工幫手教導青少年，繼去年帶隊到北京和唐山考察後，馮Sir嚟緊又肩負重任，擔任Bunny即將開辦嘅德育培訓中心社監，培訓處於反叛期嘅中一至中三學生。
為防止青少年誤入歧途，Bunny早前透過青少年發展聯會在鰂魚涌開設一所逾兩萬呎嘅德育培訓中心，為初中生提供德育培訓營，住宿設施將近完成，八月正式開張。中心為每所中學度身訂造培訓課程外，最難得係請到曾任警察學校教官嘅馮Sir執教鞭，參加培訓營嘅學生規定每日要步操兩小時學習紀律，並以活動教學方式向學生灌輸德育訊息。
Bunny大讚馮Sir好耐性，而且大把招數教好學生，加上前警隊「一哥」李明逵幫手做策劃工作，極有信心糾正時下青少年不良風氣，佢預計每年會有八千名學生受惠。