立法會成立委員會調查雷曼迷債事件之初，代表銀行界嘅議員、東亞銀行主席李國寶當時充當銀行說客，向議會同僚落嘴頭，最後鎩羽而歸，委員會預計暑假之後，就會請班銀行高層上立法會解畫，所以李國寶最近又出動，不停接觸政黨，進行游說，結果碰到一鼻子灰。
前日下午，李國寶請民主黨上中環東亞總行頂樓食飯，席間李國寶多次對甘乃威明讚暗寸，話潮州甘搞雷曼單嘢搞到有聲有色，不過，甘乃威唔理咁多，一直保持笑容，因為佢哋早有後着。食完甜品之後，甘乃威先至向李國寶施以突襲，佢攞出一封請願信，抗議東亞銀行將鴨脷洲分行關閉，李國寶引狼入室，焗住面懵懵接信啦，點知甘乃威絕到連相機都帶埋，一手遞畀黨友李永達，將李國寶嘅窘態如實記錄落嚟，李國寶呢鋪都算被甘乃威陰到正，送客之後閂埋門唔知會唔會用錘仔揼心口呢？
甘乃威玩殘李國寶，大快人心，不過，聽講佢有啲黨友就頗有微言，之前民主黨同財經事務及庫務局官員食飯時，甘乃威都用過類似嘅區議員式嘅突襲請願行動，場面都幾尷尬㗎！