驚濤駭浪嘅○九年過咗半年，上半年港股尋日結束，雖然近日嘅升幅冇早前咁凌厲，但總結起嚟，仍然有兩成七升幅。有人話升得瘋狂，小股民不敢貿然追貨。經驗老到嘅工業家蔣震就話，買股票投資根本毋須理會個市升定跌，最緊要揀實力雄厚嘅公司股票，每年有息收就得嘞！蔣震嘅乖女蔣麗芸（Ann）就附和話，如果要揀啱有實力嘅公司，最重要係投資者本身肯勤力做功課，睇多啲上市公司資料，投資就會穩陣好多。
阿Ann買股票要做好晒功課，但東華三院前主席馬清鏗仲穩陣得多，事關佢唔買股票嘅，佢話鍾意買物業多啲，因為佢認為只要有能力供樓，衰極都有間屋住吓，但股票跌幅就可以好大。馬清鏗卸任東華主席已有一段時間，佢回想起金融海嘯期間籌款都不知幾困難，梗係喇，正如四叔話齋「水瓜打狗唔見一截」，仲邊度敢去搵人捐錢吖！