卓妮問佢，為何偏偏情迷少數民族？讀哲學出身嘅趙公子話，自小留學英國過住城市人生活，直至到訪內地山區，驚覺中國保留咁多原始生態及文化遺產，佢發現東北有個鄂倫春少數民族仍然以狩獵維生，生活落後但純真，一住就鍾意到唔捨得走，五年前同太太鄭慧師創立鄂倫春基金會推廣少數民族文化，閒來孭背囊到訪山區至少一個月，試過幾日冇涼沖滋味，趙公子咁勇，卓妮都嚇一跳。

朱鼎健做掌上壓修身

聽聞爸爸趙世光及媽媽何琍琍對佢呢種不羈性格亦有微言，但趙公子一於懶理，佢對外人亦唔易妥協，前日酒會上有報館記者舉機影佢相，式慶即時怒罵對方：「你咁影我相，有冇問過我呀？」嚇到在場班記者目瞪口呆。

卓妮轉頭撞見觀瀾湖太子爺朱鼎健（Ken），佢自爆近日勤做掌上壓修身，皆因工作繁忙頻頻四圍飛，身心疲累，近月開始日做三百下掌上壓及每星期跑三十公里Keep Fit，即時醒神晒。阿Ken即場谷胸以示修身成績，話依家着起套西裝，分外有線條感喎。

卓妮