新濠博亞用咗五年時間興建嘅新濠天地第一期喺本月中正式開幕，身為新濠博亞聯席主席嘅何猷龍最近忙到做唔停手，不過日前賭王何鴻燊獲演藝學院頒授榮譽博士學位，為人子女嘅猷龍就算幾忙，嗰日都抽時間捧爸爸場，佢仲好開心咁話逆市開張嘅新濠天地生意出奇地好，業績超出預期添。
豬流感搞到全港幼稚園停課，猷龍三歲嘅女開嗣近日冇學返，所以頻頻投訴爸爸冇時間陪佢，為咗氹囡囡開心，猷龍惟有辛苦啲每日香港澳門兩邊走，爭取時間陪屋企人。話時話，猷龍呢個番書仔點識得幫個女改個咁深嘅名呢﹖佢笑言：「個名係父母改嘅，我都係識睇唔識解，不過佢哋（燊哥和二太藍瓊纓）改得就一定係好嘢！」
我哋查過字典，原來個「嗣」字有承繼、子孫等意思，燊哥將孫女改名開嗣，顧名思義就係希望猷龍幫何家開枝散葉，繁衍子嗣。燊哥恨抱孫恨到出晒面，睇嚟猷龍除咗要努力搞好新濠天地外，仲要加把勁造人，為爸爸生番個男孫先得喇。
卓妮