點解咁講？因為立法會議員搞考察團樂此不疲，搞親都係去好吸引人嘅目的地，佢哋嘅品味咁高，搞旅行社一定有得做。最新鮮熱辣成團嘅係去北美洲幾個城市視察海濱規劃發展，就算有豬流感都冇有怕。

立法會放暑假期間，出團嘅頭炮係由滅貧事宜小組委員會搞嘅台灣南韓七天團，目的係考察當地嘅社會企業政策，本月十九日啟程，先去台北四日，然後轉飛首爾「視察」多三日，二十五日返港。暫時有七名議員報咗團，包括五名委員會委員同兩名非委員，由委員會主席民協馮檢基做團長，預計每人團費介乎二萬多至接近三萬元。

歐遊團費三四萬走唔甩

第二團係由議會聯絡小組委員會搞嘅東歐三國十一天浪漫遊，目的係考察當地嘅政改經驗同議會運作，暫定喺九月十三日起行，行程包括捷克嘅布拉格、克羅地亞嘅薩格勒布同匈牙利嘅布達佩斯，由於未必安排到直航機，行程頭尾仲可能要喺德國短暫停留，九月二十三日先至返香港，團費仲未計到，估計三、四萬銀肯定走唔甩。呢團一共有九名議員報名，其中八人用公費，委員會主席兼訪問團團長「大舊石」石禮謙就選擇自費。去歐洲睇政改，肯定令人大開眼界。

最後一個團係新鮮熱辣由海濱規劃事宜小組委員會建議搞嘅美加九天團，目的係考察當地嘅海濱規劃發展，暫定喺九月二十五日起行，行程包括紐約、波士頓、巴爾的摩同溫哥華等豬流感重災區，十月三日立法會復會前幾日先返港，暫時有六名議員報咗名，包括起程兩日前先遊完東歐返香港嘅大舊石，認真頻撲，不過呢次佢就係用公費報團嘅，拉上補下估計可以同東歐團打番個和。

今次美加團由委員會主席劉秀成做團長，佢同大舊石同屬專業會議成員，同一個政團派兩個人一齊去考察，係咪實際有需要呢？只有佢哋自己先至解答到。

睇完上述嘅例子，大家都應該同意借用某個啤酒廣告嘅名言，仲要搵埋葛民輝嚟旁白：如果立法會轉行搞旅行社，可能係世界上最好嘅。