太古（中國）主席陳南祿（Philip）在任國泰航空行政總裁時，好多時都會同一班俏空姐或地勤美女合照，十足占士邦咁款，雖然依家「占士邦」後繼無人，但Philip出書做善事嘅美德仲長留喺國泰。一班國泰地勤人員將近幾年來在機場嘅所見所聞結集成「地勤手記」，新書所有收益將撥捐恩光之友會，幫助有需要嘅智障人士。
有份著書嘅地勤有靚仔有靚女，各人分享咗自己擔任地勤期間最難忘經歷。其中一位櫃位地勤員憶述，曾經遇見隔籬櫃台有一個無着褲嘅男乘客辦理登機手續，呢位男乘客下身只用大毛巾圍住，惹來機場保安注視，地勤覺得唔對路上前截查，發現原來位男乘客大腿唔小心畀熱水淥親，所以唔着得褲，地勤因而體會到，凡事不能單睇外表嘅。
一班地勤出書，機管局行政總裁許漢忠都有去捧場。許漢忠由港龍做到機管局，講起飛機，好多古仔講。佢話幾十年前有錢人先至有能力搭飛機，記得七十年代搭飛機到東南亞國家，機票要幾百元一張，非常昂貴，但隨着飛機普及化，好多人可以一嘗搭飛機滋味。