精神科醫生固之然係少得唔成比例，其實社工一樣人手不足。好多精神病康復者話喎，出院之後根本就冇社工跟進。所以話啫，好多人死得真係好冤枉㗎，政府任由精神病人靠自己一手一腳「融入社區」，融入唔到咯喎，咪累及街坊囉！

社工人手到底不足成點？不如睇睇一項調查報告。華員會社工職系分會訪問咗三十三名負責處理家庭及兒童問題嘅社工，結果顯示，平均每月超時工作三個工作天，三成受訪社工認為超時工作嚴重影響家庭生活，造成工作壓力，甚至有百分之六曾經諗過或者試過自殺。

嘩！平時勸人唔好自殺嘅社工，自己都頂唔順話要自殺，可想而知香港呢個社會係幾咁得人驚。呢班受訪社工係負責家庭及兒童問題嘅，連佢哋都覺得自己嘅超時工作嚴重影響家庭生活，唔通又要請另外一班社工去輔助呢班社工咯喎？

社工忙到一個程度，五成受訪者表示，如果可以選擇，會自願離職。呢鋪真係大大鑊！假如真係有一半社工劈炮，功夫茶相信香港將會亂到一仆一碌。樓上老公又話虐妻，樓下老母又話打仔，中間阿仔又話跳樓，七個蓋都唔知點樣冚十個樽。

講番精神病人嗰一筆，缺乏社工跟進梗係問題多多啦，其實歸根究柢係醫管局疏忽照顧。根據醫管局嘅講法，○九至一○年度將會動用二千三百幾萬，聘請二十八名「個案管理經理」推行「個案管理模式」，跟進二千八百名可能喺出院後三個月出事嘅精神病人。

對於呢個所謂跟進，中大精神科教授李誠就話嘞，醫管局嘅「個案管理模式」係一個國際笑話，因為三個月時間太短，唔排除三個月之後病人會發生慘劇。

計功夫茶話齋，的而且確係國際笑話，試諗諗，二十八人服務二千八百人，即係一個招呼一百個，而且呢一百個都係好難應付嘅，莫講話一個人得兩隻手吖，即使七手八臂，恐怕都唔得掂。

好心醫管局認真改善精神科服務質素啦，醫生唔夠加醫生，病床唔夠加病床，唔好吓吓將病人亂咁「融入社區」至得。另外，好心社署認真檢討社工人手啦，香港社會問題多籮籮，就算精神冇問題，市民間唔中都會做出一啲非理性行為，如果冇社工幫幫手，唔知幾多慘劇會陸續上演。

噫咦，講到呢度，功夫茶有少少思疑社署署長余志穩自己都要搵社工幫幫手，係咪工作太大壓力呀？所以成日想偷懶呀？搵個社工開解吓囉，開解完咯喎，即刻做嘢，嚴防香港亂到一仆一碌！